Olmaotadagi RFMShga oʻquvchilar ommaviy zaharlanganidan soʻng direktor tayinlandi

Olmaotada Respublika fizika-matematika maktabi filialiga Almaz Kungozhin yana direktor etib tayinlandi. Bu haqdagi kadrlar qarorini oʻquvchilarning ommaviy zaharlanishidan soʻng RFMSh matbuot xizmati maʼlum qildi.

Kungozhin matematika boʻyicha PhD darajasiga ega va shu maktabni tamomlagan. U 2018–2023-yillarda Olmaota filialiga rahbarlik qilgan. Bungacha Kungozhin RFMShda oʻqituvchi boʻlib ishlagan, maktab oʻquvchilarini matematika olimpiadalariga tayyorlagan hamda ixtisoslashtirilgan va eksperimental ishlar boʻyicha direktor oʻrinbosari lavozimida faoliyat yuritgan. 2023-yil sentabridan u RFMSh boshqaruvi raisining birinchi oʻrinbosari boʻlgan.

Meirbek Meirlan Yedigeruly filial direktori lavozimidagi faoliyatini yakunladi. Manbada uning ishdan boʻshatilishi zaharlanish boʻyicha tergov natijalari bilan bogʻliq yoki bogʻliq emasligi aniqlashtirilmagan.

Oʻtkir ichak infeksiyasi alomatlari boʻlgan qariyb 50 nafar oʻquvchining shifoxonaga yotqizilgani 14-oktabr kuni maʼlum boʻldi. Shundan soʻng maktab darslarni onlayn formatga oʻtkazdi, yotoqxona va oshxona vaqtincha ishini toʻxtatdi. Sanitariya mutaxassislari binolarni tekshirib, namunalarni tahlilga yubordi.

Tayyor taomlarda mikroblar bilan ifloslanish, oziq-ovqat namunalari va idishlardan olingan surtmalarda esa ichak tayoqchasi guruhi bakteriyalari aniqlandi. Oshxonaning toʻrt nafar xodimida oltinrang stafilokokk topildi. Olmaota politsiyasi ommaviy zaharlanish holati boʻyicha jinoyat ishini qoʻzgʻatdi.