Oʻzbekistonda davlat xizmatchilarining korrupsiyaga barqarorligini tekshirish tartibi ishlab chiqildi

Oʻzbekistonda davlat sektori xodimlarining korrupsiyaga barqarorligini baholash toʻgʻrisidagi nizom loyihasi tayyorlandi. Normativ-huquqiy hujjatlar loyihalari portalining jadvaliga koʻra, 9 noyabr hujjatni jamoatchilik muhokamasidan oʻtkazishning soʻnggi kuni.

Tekshiruv tartibini davlat organlari, hokimliklar, davlat muassasalari, davlat maqsadli jamgʻarmalari va davlat ishtirokidagi korxonalar rahbarlari hamda xodimlariga tatbiq etish taklif qilinmoqda. Har uch yilda bir marta oʻtkaziladigan rejalashtirilgan testdan tashqari, loyiha ishga qabul qilishda hamda korrupsiya xavfi oʻrta yoki yuqori boʻlgan lavozimlarga tayinlashda tekshiruvdan oʻtkazishni nazarda tutadi.

Test sinovlarini AssessPro platformasida Rahbar kadrlarni baholash markazi va agentlikning hududiy boʻlinmalarida oʻtkazish taklif qilinmoqda. Ishtirokchilar oʻzbek, qoraqalpoq yoki rus tillaridan birini tanlashi mumkin. Sentabr oyida Korrupsiyaga qarshi kurashish agentligi ekspertlar korrupsiyaga qarshi barqarorlikni baholash uchun savollarni allaqachon ishlab chiqqanini maʼlum qilgan edi.

Test natijalariga koʻra, ishtirokchilarni toʻrt toifaga ajratish taklif qilinmoqda. Yuqori baho xodimni xavfning istalgan darajasiga ega lavozimga tavsiya qilish imkonini beradi, oʻrta baho esa xavfi past yoki oʻrta boʻlgan lavozimga tavsiya qilishga imkon beradi. Oʻrtachadan past baho olinganda, xavfi oʻrta boʻlgan lavozimda ishlash kuchaytirilgan nazoratni talab qiladi.

Past baho olgan xodimlar uchun oqibat Prezidentning UP-243-sonli farmonida belgilangan. Ular korrupsiya xavfi past boʻlgan boshqa lavozimga majburiy ravishda oʻtkaziladi.