Mirziyoyev «kambagʻal oilalar qolmadi» mazmunidagi hisobotlardan voz kechishni talab qildi
Buxoro viloyatida 40 ming nafar ishsiz bor, 270 ming aholining daromadi esa oʻrtacha koʻrsatkichdan ancha past. Prezident aholi daromadlarini oshirish boʻyicha har bir tuman kesimida rejalar ishlab chiqishni topshirdi
Shavkat Mirziyoyev 4 noyabr kuni Buxoro viloyatini rivojlantirish masalalariga bagʻishlangan yigʻilishda kambagʻallikka qarshi kurashda rasmiyatchilikka asoslangan yondashuvni tanqid qildi.
Yigʻilishda keltirilgan maʼlumotlarga koʻra, viloyatning 99 ming aholisi xorijda ishlamoqda. Mehnat migratsiyasidan qaytgan yana 24 ming kishi ishga ega emas. Hududdagi ishsizlarning umumiy soni 40 ming nafarni tashkil etadi.
«Shu paytdan boshlab “kambagʻal oilalar qolmadi” mazmunidagi hisobotlar qabul qilinmaydi», — dedi prezident.
Shuningdek, viloyatdagi 270 ming aholining daromadi oʻrtacha koʻrsatkichdan sezilarli darajada past ekani qayd etildi. Ularning daromadlarini oshirish uchun har bir tuman kesimida rejalar tayyorlash topshirildi. Shuningdek, xorijda kam haq toʻlanadigan ishlarda band boʻlgan migrantlarni kasb-hunarga oʻqitishni tashkil etish vazifasi qoʻyildi.
Yigʻilishda hudud iqtisodiyotini diversifikatsiya qilish zarurati muhokama qilindi. Yalpi hududiy mahsulotning 43 foizi qishloq xoʻjaligi va xomashyo qazib chiqarish hissasiga toʻgʻri keladi, xizmatlar ulushi esa oʻn yil ichida atigi 33 foizdan 36 foizgacha oshgan.
Yana oʻqing
Oʻzbekiston jamoatchilik diplomatiyasi GPDNet tarmogʻining toʻlaqonli aʼzosiga aylandi
Oʻzbekiston16:28
Oʻzbekistonda davlat xizmatchilarining korrupsiyaga barqarorligini tekshirish tartibi ishlab chiqildi
Oʻzbekiston15:51