Qirgʻizistonda poydevor qurilishi yakunlangunga qadar kvartiralarni sotish va mablagʻ yigʻish taqiqlandi

Qirgʻizistonda quruvchilarga qurilishning nol sikli yakunlangunga qadar turar joy va noturar joylarni sotish taqiqlandi. Tegishli buyruqni Qurilish, arxitektura va uy-joy kommunal xoʻjaligi vaziri Nurdan Oruntayev imzoladi.

Nol sikl poydevor qurilishi va yerosti qurilish ishlarining toʻliq yakunlanishini oʻz ichiga oladi. Bu bosqich tugamaguncha kompaniyalar fuqarolar va yuridik shaxslarning qurilish uchun mablagʻlarini jalb qila olmaydi.

Taqiq ulushli ishtirok shartnomalari, dastlabki shartnomalar va bunday moliyalashtirishni nazarda tutuvchi boshqa fuqarolik-huquqiy bitimlarga ham tatbiq etiladi. Qurilayotgan obyektlarni reklama qilish ham mumkin emas.

Qoidabuzarliklarni aniqlash vazifasi Davlat arxitektura-qurilish nazorati departamentiga yuklatildi. Tekshiruvlar muddatidan oldingi sotuvlar, mablagʻ jalb qilish va noqonuniy reklamani qamrab olishi kerak. Qurilish kompaniyalari bilan allaqachon tushuntirish ishlari olib borilmoqda.

Gap qurilishning boshlangʻich bosqichida sotuvlarni cheklash haqida bormoqda, uy foydalanishga topshirilguniga qadar ulushli ishtirokni toʻliq taqiqlash haqida emas. Buyruqning kuchga kirishining aniq sanasi, raqami va oʻtish davriga oid qoidalar keltirilgan nashrda koʻrsatilmagan.