Toshkentda qazish ishlari va yoʻllarni yopish uchun ruxsatnomalar onlayn shaklga oʻtkazildi

Toshkentda yer qazish ishlariga ruxsatnoma beruvchi elektron tizim ishga tushirildi. Bu haqda Yoʻl harakatini tashkil etish markazi xabar berdi.

order.tashkent.uz platformasi orqali qazish ishlarini olib borish, muhandislik kommunikatsiyalarini yotqizish, shuningdek, yoʻllar va hududlarni vaqtincha yopish boʻyicha ariza topshirish mumkin.

Markazning tushuntirishicha, tizim ishlarni oldindan rejalashtirish va ularni masʼul tashkilotlar bilan kelishishga yordam berishi kerak. Bu harakat xavfsizligi hamda yer osti tarmoqlarining saqlanishi uchun zarur.

Markaz taʼkidlashicha, kelishilmagan qazish ishlari tirbandliklarni yuzaga keltirishi, piyodalarga xalaqit berishi va kommunal xizmat koʻrsatishda uzilishlarga olib keladigan kommunikatsiyalar shikastlanishiga sabab boʻlishi mumkin.

Yoʻl harakatini tashkil etish markazi, shuningdek, zarur ruxsatnomalarsiz yer va taʼmirlash ishlarini olib borish hamda umumiy foydalanishdagi hududlarda joylashgan obyektlarni oʻzboshimchalik bilan oʻzgartirish uchun javobgarlik borligini eslatdi.

Platformaning ishga tushirilishi ariza topshirish usulini oʻzgartiradi. Bu ishlar boshlanishidan oldin ruxsat olish zaruratini bekor qilmaydi.