Prezident Rustami Emomaliga “Fidokorona xizmatlari uchun” ordenini topshirdi

Tojikiston Majlisi Oli Majlisi milliyining raisi Oʻzbekistonda rasmiy tashrif bilan boʻldi. Suhbat avvalida u Shavkat Mirziyoyevga Emomali Rahmonning salomi va ezgu tilaklarini yetkazdi.

Tomonlar doʻstlik, yaxshi qoʻshnichilik, strategik sheriklik va ittifoqchilik munosabatlarini, jumladan, parlamentlararo hamkorlikni rivojlantirish masalalarini koʻrib chiqdilar. Oʻzaro savdo va yuk tashish hajmi oshgani, sanoat, qurilish, energetika, qishloq xoʻjaligi va elektrotexnika sohalaridagi qoʻshma loyihalar, shuningdek, Investitsiya kompaniyasi faoliyati qayd etildi.

Poytaxtlar va hududlar oʻrtasidagi toʻgʻridan-toʻgʻri aloqalarning roli alohida taʼkidlandi. Ishtirokchilar madaniy-gumanitar, taʼlim va turizm sohalaridagi almashinuvni kengaytirish, shuningdek, qonunchilik organlarining davlat rahbarlari kelishuvlari va umumiy tashabbuslarni amalga oshirishdagi ishtirokini yanada faollashtirish tarafdori boʻldilar.

Shu maqsadda parlamentlararo komissiyalar, doʻstlik guruhlari va tegishli qoʻmitalar faoliyatini kuchaytirish taklif etildi. Orden Rustami Emomaliga Oʻzbekiston va Tojikistonning strategik sheriklik va ittifoqchilik munosabatlari hamda parlamentlararo muloqotini rivojlantirishga qoʻshgan hissasi uchun topshirildi.