Oʻzbekiston, Qirgʻiziston va Qozogʻiston mavsumiy suv va elektr energiyasi almashinuvini muvofiqlashtiradi
Oʻzbekiston, Qirgʻiziston va Qozogʻiston suvni mavsumiy chiqarish hamda elektr energiyasini oʻzaro yetkazib berishni muvofiqlashtiradi. Bu haqda 19 noyabr kuni suv xoʻjaligi vaziri Shavkat Hamrayev maʼlum qildi.

Qirgʻizistonga elektr energiyasi ayniqsa qishda, Oʻzbekiston va Qozogʻistonga esa sugʻorish uchun suv bahor va yoz oylarida juda zarur. Shu sababli mamlakatlar suv omborlarining ishlash rejimini energiya yetkazib berish bilan bogʻlamoqda.
Elektr energiyasi ishlab chiqarish uchun Qirgʻiziston Toʻqtoʻgʻul suv omboridan suv chiqarishni oshirmoqda. Ayni paytda qoʻshni davlatlar vegetatsiya davrida suv olishdan manfaatdor. 20 iyun kuni uch mamlakat 2026 yilgi vegetatsiya davrida suv chiqarish va elektr energiyasini oʻzaro yetkazib berishni muvofiqlashtirish toʻgʻrisidagi protokolni imzoladi.
Hamrayevning taʼkidlashicha, mintaqadagi munosabatlar 2005—2015 yillarga nisbatan yaxshilangan, biroq iqlim xatarlari saqlanib qolmoqda: muzliklar erimoqda, manbalardagi suv esa kamaymoqda. Uning soʻzlariga koʻra, Rogʻun GESi qurilishi yana kamida toʻrt-besh yil davom etadi, hajmi 13,3 mlrd kub metr boʻlgan suv omborini toʻldirish esa taxminan 2035 yilga kelib yakunlanadi. Vazirning baholashicha, Qoʻshtepa kanali orqali toʻliq suv olish 2030 yildan oldin boshlanmaydi. Kelgusida Afgʻoniston Amudaryodan har yili 6 mlrd kub metrdan 10 mlrd kub metrgacha suv olishi mumkin.
Yana oʻqing

Senatda “Radioaktiv chiqindilar toʻgʻrisida”gi qonun muhokama qilindi
Siyosat12:47
Shavkat Mirziyoyev Oʻzbekiston va Turkiya kengashining ilk yigʻilishida qatnashadi
Siyosat19-noyabr, 16:03

